Buldak kjúklingur

Þessi uppskrift getur fælt marga frá þegar litið er á magnið af chili dufti sem notað er í sósuna en raunin er sú að rétturinn er alls ekki það sterkur. Kóreska chiliduftið sem notað er í réttinn heitir Gochugaru og er milt og nánast með ávaxtakeim fremur en að vera sterkt og ef fólk er lítið fyrir sterkan mat er ein matskeið af gochujang chili maukinu nóg. Mozzarella osturinn er einkennileg viðbót sem var ekki upprunalega í uppskriftinni en osturinn gefur milt og skemmtilegt bragð við þennan ágæta rétt.

4-5 kjúklingabringur skornar í bita

3 msk gochugaru (kóreskt chiliduft)

2 msk gochujang chili mauk

1 msk sojasósa

3 msk mirin hrísgrjónavín

2 msk púðursykur

1 msk ostrusósa

1 msk sesamolía

1 laukur, smátt saxaður

4 lauf hvítlaukur, hakkaður

2 msk rifinn engifer

olía til steikingar

120 g mozzarella ostur, skorinn í sneiðar

Byrjið á að skera kjúklinginn í bita.

Hakkið hvítlaukinn og rífið niður engifer. Skerið laukinn smátt.

Blandið saman hráefnunum í sósuna og setjið lauk, hvítlauk og engifer saman við. Hellið sósunni yfir kjúklinginn og hrærið vel til að hjúpa allan kjúklinginn vel í sósunni.

Hitið olíu á pönnu og steikið kjúklinginn í nokkrar mínútur. Þegar kjúklingurinn er fulleldaður má setja hann í ofnfat (nema pannan megi fara í ofn). Setjið mozzarella ostinn í sneiðum yfir réttinn og setjið síðan undir grillið í ofninum í nokkrar mínútur til að bræða ostinn.

Stráið sneiddum vorlauk og sesamfræjum yfir réttinn og berið fram með soðnum hrísgrjónum.